Corenta anos de baloncesto no Barco no Outono Fotográfico

mércores 26 outubro 2011

Grandes momentos do baloncesto no Barco (1949-1990) e o título da exposición que poderá verse no Centro comarcal en todo o mes de novembro, dentro do Outono fotográfico. Trátase dunha recompilación de fotografías deste deporte e da súa repercusión na vida local. Está producida polo concello do Barco e comisariada por Gustavo Docampo, a partir de fotografías antigas cedidas por veciñas e veciños do Barco. Será inaugurada o luns día 31 de outubro ás 19.30 horas.

O baloncesto aínda era incipiente en España cando en 1949 comeza a practicarse no Barco. Da man de Julián Trincado, enxeñeiro de Saltos do Sil, formouse o primeiro Club Baloncesto Barco que xogaba no patio de terra da Academia Dequidt. Entre 1951 e 1957 este equipo acadou todos os campionatos provinciais. Logo, ao formarse as ligas, en 1960, xoga coa elite do baloncesto galego. Os mellores equipos de Santiago, Vigo, Ferrol, A Coruña, Lugo e Ourense tiñan enormes dificultades para puntuar nos seus desprazamentos ao Barco. Crease unha certa épica de David contra Goliat naqueles memorábeis partidos, seguidos por uns seareiros entregados e que foron lugar de encontro e convivencia para varias xeracións de mozos e mozas do Barco.

No Centro Comarcal de Valdeorras – Casa de Río Cigüeño. Rúa da Veiguiña, 5. O Barco de Valdeorras. Do 31 outubro ao 30 novembro. Horarios: 10 a 14 e de 17 a 20 (luns a venres) 11 a 14 (sábados)

Comeza o Outono Fotográfico cunha exposición sobre as actuacións na igrexa de Santo Estevo de Pardollán

martes 25 outubro 2011

Este venres comeza no Barco o Outono Fotográfico coa exposición titulada  “Santo Estevo de Pardollán: borrar a ruína, erguer o futuro” que produciu o Concello do Barco con fotografías de Carme Varela, Susana Fernandez, Jose Antonio Gil, Gustavo Docampo e Asociación Santo Estevo de Pardollán sobre a limpeza e posta en valor das ruínas desta igrexa románica por parte da asociación O Sorriso de Daniel e da Asociación Santo Estevo de Pardollán. A mostra poderá visitarse na Galería Sargadelos ata o 16 de novembro e a inauguración será o venres 28 de outubro ás 19 horas.

A igrexa de Santo Estevo (S.XII), situada nas proximidades da aldea de Pardollán (Rubiá), é posibelmente a igrexa románica máis antiga da diocese de Astorga e unha das escasas representacións desta arte na comarca de Valdeorras. É tamén o lugar onde se celebraba o ritual do Santo do Arangaño, ao que levaban antigamente os nenos que tiñan problemas de raquitismo.

A asociación O Sorriso de Daniel, para a defensa do patrimonio galego, e a Asociación Santo Estevo de Pardollán levaron a cabo unha actuación exemplar para chamar a atención sobre o abandono deste monumento. Un grupo de voluntarios e voluntarias limparon o pasado mes de xullo a igrexa  e a súa contorna. Levaba máis de cincuenta anos abandonada e a maleza foi ocultando moitos dos elementos máis senlleiros da súa fábrica.

Esta exposición é a reportaxe gráfica dunha iniciativa que uniu vontades a prol da recuperación da memoria dun pobo e da conservación dos bens comúns que explican o seu tránsito pola Historia, as súas creacións culturais. As fotografías foron tomadas nos meses de xullo e agosto de 2011.

O Barco recibe a IX Bienal de Pintura do Eixo Atlántico

martes 27 setembro 2011

A IX edición da Bienal de pintura do Eixo Atlântico inaugura a súa exposición no Barco de Valdeorras o próximo día 30 de setembro no “Centro Comarcal Casa do Río Cigüeño”, na Rúa da Veiguiña, nº 5. É a única exposición itinerante e transfronteiriza entre dous países, na Unión Europea. As obras percorren, ao longo de dous anos, as 34 cidades que forman parte da entidade transfronteiriza.
 
Trátase dun acontecemento artístico de primeira magnitude xaque, ademais de promocionar aos artistas da eurorrexión, se consolida como unha das tres mellores exposicións itinerantes de pintura da Península Ibérica. Nesta última edición concorreron cerca de 200 obras, das que foron elixidas trinta que forman parte da XI Bienal.
 
Hai que destacar que esta exposición cumpre nove edicións, cun cadencia de entre un e dous anos de exposición itinerante, e dicir un periplo de 15 anos de historia do Eixo Atlántico, sendo unha das primeiras iniciativas da entidade transfronteiriza. Ademais, constitúese como a única exposición en Europa de carácter itinerante y que se desenvolve en dous países.
 
O Obxectivo da Bienal de Pintura é o impulso á creatividade dos artistas e á creación valor engadido no patrimonio artístico da eurorrexión.
 
A pintora Montserrat Fierro diante da obra gañadoraA Bienal concedeu un premio “Eixo Atlántico” á mellor obra do certame, cun valor de 3.000 euros a pontevedresa Monserrat Frieiro Dantas e dous segundos premios de 1.500 euros cada un, á mellor obra de autor portugués, Miguel Vasconcellos, e a mellor obra de autor galego para Joseba Muguruzábal Pérez. Igualmente concedeuse o premio “Jovens Talentos Luso – Galaicos” que recaeu na galega Raquel Iglesias Gándara, premio dirixido aos novos artistas con idades comprendidas entre os 16 e os 25 anos, inclusive, cun valor de 1.500 euros.
 
Fortalecer lazos
 
“Realmente, como se constrúe o futuro é con actividades coma esta. É imposible crear una eurorrexión sen a cultura, o deporte ou os movementos sociais”, lembra o secretario xeral do Eixo Atlántico, Xoán Vázquez Mao, tras destacar que a Bienal é a mellor mostra de que “traballando todos xuntos, man con man, se poden conseguir os obxectivos”. Algúns dos creadores premiados nas convocatorias precedentes son, hoxe en día, creadores recoñecidos como no caso do propio presidente do xurado de esta edición, Xosé Luis Otero.
 
A Bienal de pintura do Eixo Atlántico é desenvolvida pola colaboración entre o Eixo Atlántico, a Dirección Xeral de Xuventude e Solidariedade da Xunta de Galicia, Caixanova, a Fundação da Juventude, e o Instituto Português da Juventude.

No Centro Comarcal de Valdeorras do 30 de setembro ao 29 de outubro. De 10 a 14 e de 17 a 20 horas de luns a venres. Os sábados de 11 a 14 horas.

Fotografías da Rapa das Bestas en Novacaixagalicia

mércores 16 febreiro 2011

O venres 18 de febreiro ás 19 horas inaugúrase no Barco a Exposición FOTORAPA10mostra colectiva de 21 fotógrafas e fotógrafos participantes na III edición do Concurso Internacional de Fotografía Rapa das Bestas de Sabucedo que organiza a Concelleria de Medio Rural e Turismo do concello da Estrada.
A exposición permanecerá aberta ata o 15 de Marzo na sala de exposicións Nova Caixa Galicia no Barco de Valdeorras cun horario de visita -agas festivos- de 19h a 21h de luns a sábados.

Un aire de mudanza, fotografías de Ismael Núñez

mércores 27 outubro 2010

O Concello do Barco continúa co labor de recuperación da súa imaxe gráfica e, en particular, dos fotógrafos que foron deixando constancia da vida que lles tocou vivir. Ismael Núñez Negral (Castroponce de Valderaduey, 1931 – O Barco, 2008) compatibilizou as profesións de carteiro e fotógrafo. Andou de retratista polas festas, traballou por encarga para particulares, concello, xulgado, notaría e para a prensa, primeiro para “El Pueblo Gallego” e logo para “La Región”, no momento en que o correspondente Baldomero García poñía en marcha, cara a mediados dos anos setenta, unha delegación do xornal provincial en Valdeorras. Na fotografía de Ismael Núñez predomina un aire de mudanza, tanto no que atinxe á evolución da traza urbanística da vila do Barco, como ás condicións en que se desenvolve o día a día dos seus habitantes nesas dúas décadas que marcan, para o conxunto da sociedade, o comezo dun novo tempo. A mostra, incluída no Outono Fotográfico, reune unhas cincuenta imaxes do Barco dos anos 60 e 70 do século XX. Será inaugurada o martes días 2 ás 19h30 no Centro Comarcal. 

Fotografía: Aniversario nas Casas Baratas II. c. 1960. Ismael Núñez

No Centro Comarcal de Valdeorras – Casa de Río Cigüeño. Rúa da Veiguiña, 5. O Barco de Valdeorras. Do 2 ao 30 novembro. Horarios: 10 a 14 e de 17 a 20 (luns a venres) 11 a 14 (sábados). Catálogo.